श्री मुनि राजत समता संग, कायोत्सर्ग समाहित अंग ॥टेक॥

करतैं नहिं कछु कारज तातैं, आलम्बित भुज कीन अभंग
गमन काज कछु है नहिं तातैं, गति तजि छाके निज रस रंग ॥
श्री मुनि राजत समता संग, कायोत्सर्ग समाहित अंग ॥१॥

लोचन तैं लखिवो कछु नाहीं, तातैं नाशादृग अचलंग
सुनिये जोग रह्यो कछु नाहीं, तातैं प्राप्त इकन्त-सुचंग ॥
श्री मुनि राजत समता संग, कायोत्सर्ग समाहित अंग ॥२॥

तह मध्याह्न माहिं निज ऊपर, आयो उग्र प्रताप पतंग
कैधौं ज्ञान पवन बल प्रज्वलित, ध्यानानल सौं उछलि फुलिंग ॥
श्री मुनि राजत समता संग, कायोत्सर्ग समाहित अंग ॥३॥

चित्त निराकुल अतुल उठत जहँ, परमानन्द पियूष तरंग
'भागचन्द' ऐसे श्री गुरु-पद, वंदत मिलत स्वपद उत्तंग ॥
श्री मुनि राजत समता संग, कायोत्सर्ग समाहित अंग ॥४॥