अतिसंक्लेश विशुद्ध शुद्ध पुनि, त्रिविध जीव परिणाम बखाने ॥टेक॥

तीव्र कषाय उदय तैं भावित, दर्वित हिंसादिक अघ ठाने ।
सो संक्‍लेशभाव फल नरकादिक, गति दुःख भोगत असहाने ॥
अतिसंक्लेश विशुद्ध शुद्ध पुनि, त्रिविध जीव परिणाम बखाने ॥१॥

शुभ उपयोग कारनन में जो, रागकषाय मन्द उदयाने ।
सो विशुद्ध तसु फल इन्द्रादिक, विभव-समाज सकल परमाने ॥
अतिसंक्लेश विशुद्ध शुद्ध पुनि, त्रिविध जीव परिणाम बखाने ॥२॥

परकारन मोहादिक तै च्युत, दरसन-ज्ञान-चरन रस पाने ।
सो है शुद्ध भाव तसु फल तै, पहुँचत परमानन्द ठिकाने ॥
अतिसंक्लेश विशुद्ध शुद्ध पुनि, त्रिविध जीव परिणाम बखाने ॥३॥

इनमे जुगल बन्ध के कारन, परद्रव्याश्रित हेय प्रमाने ।
'भागचन्द' स्वसमय निज हित लखि, तामे रम रहिये भ्रम हाने ॥
अतिसंक्लेश विशुद्ध शुद्ध पुनि, त्रिविध जीव परिणाम बखाने ॥४॥