Index

!! श्रीसर्वज्ञवीतरागाय नम: !!

श्रीमद्‌-राम-सिंह मुनि-प्रणीत

श्री
पाहुड-दोहा

मूल प्राकृत गाथा

आभार :

!! नम: श्रीसर्वज्ञवीतरागाय !!

ओंकारं बिन्दुसंयुक्तं नित्यं ध्यायन्ति योगिनः
कामदं मोक्षदं चैव ॐकाराय नमो नम: ॥1॥

अविरलशब्दघनौघप्रक्षालितसकलभूतलकलंका
मुनिभिरूपासिततीर्था सरस्वती हरतु नो दुरितान् ॥2॥

अज्ञानतिमिरान्धानां ज्ञानाञ्जनशलाकया
चक्षुरुन्मीलितं येन तस्मै श्रीगुरवे नम: ॥3॥

॥ श्रीपरमगुरुवे नम:, परम्पराचार्यगुरुवे नम: ॥

सकलकलुषविध्वंसकं, श्रेयसां परिवर्धकं, धर्मसम्बन्धकं, भव्यजीवमन: प्रतिबोधकारकं, पुण्यप्रकाशकं, पापप्रणाशकमिदं शास्त्रं श्री पाहुड-दोहा नामधेयं, अस्य मूलाग्रन्थकर्तार: श्रीसर्वज्ञदेवास्तदुत्तर ग्रन्थकर्तार: श्रीगणधरदेवा: प्रतिगणधरदेवास्तेषां वचनानुसारमासाद्य श्री रामसिंह मुनि विरचितं

॥ श्रोतार: सावधानतया शृणवन्तु ॥

मंगलं भगवान् वीरो मंगलं गौतमो गणी
मंगलं कुन्दकुन्दार्यो जैनधर्मोऽस्तु मंगलम्‌ ॥
सर्वमंगलमांगल्यं सर्वकल्याणकारकं
प्रधानं सर्वधर्माणां जैनं जयतु शासनम्‌ ॥

गुरु दिणयरु गुरु हिमकिरणु गुरु दीवउ गुरु देउ ।
अप्यहं परहं परंपरहं जो दरिसावइ भेउ ॥1॥

बलिहारी गुरु अप्पणइं दिउ हांडी सय वार ।
माणस हुंतउं देऊ किउ करंत ण लग्गइ वार ॥2॥

अप्पायत्तउ जं जि सुहु तेण जि करि संतोसु ।
पर सुहु वढ चितंतंयहं हियइ ण फिट्टइ सोसु ॥3॥

जं सुहु विसयपरंमुहउ णिय अप्पा झायंतु ।
तं सुहु इंदु वि णवि लहइ देविहिं कोडि रमंतु ॥4॥

आभुंजंतउ विसयसुहु जे णवि हियइ धरंति ।
ते सासयसुहु लहु लहहिं जिणवर एम भणंति ॥5॥

णवि भुंजंता विसयसुहु हियडइ भाउ धरंति ।
सालिसित्थु जिम वप्पुडउ णर णरयहं णिवडंति ॥6॥

धंधईं पडियउ सयलु जगु कम्मइं करइ अयाणु ।
मोक्खह कारणु एक्कु खणु णवि चिंतइ अप्पाणु ॥7॥

ओयइं अडबड वडवडइ पर रंजिज्जइ लोउ ।
मणसुद्धइ णिच्चल ठियइ पाविज्जइ परलोउ ॥8॥

जोणिहिं लक्खहिं परिभमइ अप्पा दुक्खु सहंतु ।
पुत्तकलत्तहं मोहियउ जाव ण बोहि लहंतु ॥9॥

अण्णु म जाणहि अप्पणउ घरु परियणु जो इट्ठु ।
कम्मायत्तउ कारिमउ आगमि जोइहिं सिट्ठु ॥10॥

जं दुक्खु वि तं सुक्खु किउ जं सुहु तं पि य दुक्खु ।
पइं जिय मोहहिं वसि गयउ तेण ण पायउ मोक्खु ॥11॥

मोक्खु ण पावहि जीव तुहुं धणु परियणु चिंतंतु ।
तोउ वि चिंतहि तउ वि तउ पावहि सुक्खु महंतु ॥12॥

घरवासउ मा जाणि जिय दुक्क्तयवासउ एहु ।
पासु कयंते मंडियउ अविचलु णीसंदेहु ॥13॥

मूढा सयलु वि कारिमउ मं फुडु तुहुं तुस कंडि ।
सिवपहि णिम्मलि करहि रइ घरु परियणु लहु छंडि ॥14॥

मोहु विलिज्जइ मणु मरइ तुट्टइ सासु णिसासु ।
केवलणाणु वि परिणवइ अंबरि जाह णिवारु ॥15॥

सप्पें मुक्की कंचुलिय जं विसु ते ण मुएइ।
भोयहं भाउ ण परिहरइ लिंगग्गहणु करेइ ॥16॥

जो मुणि छंडिवि विसयसुहु पुणु अहिलासु करेइ ।
लुंचणु सोसणु सो सहइ पुणु संसारु भमेइ ॥17॥

विसयसुह दुइ दिवहडा पुणु दुक्खहं परिवाडि ।
भुल्लउ जीव म बाहि तुहं अप्पाखंधि कुहाडि ॥18॥

उव्वडि चोप्पडि चिट्ठ करि देहि सुमिट्ठाहारु ।
सयल वि देह णिरत्थ गय जिम दुज्जण उवयारु ॥19॥

अथिरेण थिरा मइलेण णिम्मला णिग्गुणेण गुणसारा ।
काएण जा विढप्पइ सा किरिया किण्ण कायव्वा ॥20॥

उम्मूलिवि ते मूलगुण उत्तरगुणहिं विलग्ग ।
वाण्णर जेम पलंबचुय बहुय पडेविणु भग्ग ॥21॥

वरु विसु विसहरु वरु जलणु वरु सेविउ वणवासु ।
णउ जिणधम्मपरम्मुहउ मिच्छत्तिय सहु वासु ॥22॥

सो णत्थि इह पएसो चउरासीलक्खजोणिमज्झम्मि ।
जिणवयणं अलहंतो जत्थ ण ढुरुढुल्लिओ जीवो ॥23॥

अप्पा बुज्झिउ णिच्चु जइ केवलणाणसहाउ ।
ता परि किज्जइ काइं वढ तणु उप्परि अणुराउ ॥24॥

जसु मणि णाणु ण विफ्फुरइ कम्महं हेउ करंतु ।
सो मुणि पावइ सोक्खु णवि सयलइं सत्थ मुणंतु ॥25॥

बोहिविवज्जिउ जीव तुह़ुं विवरिउ तच्चु मुणेहि ।
कम्मविणिम्मिय भावडा ते अप्पाण भणेहि ॥26॥

हउं गोरउ हउं सामलउ हउं जि विभिण्णउ वण्णु ।
हउं तणु अंगउ थूलु हउं एउह जीव ण मण्णु ॥27॥
णवि तुहुं पंडिउ मुक्खु णवि णवि ईसरु णवि णीसु ।
णवि गुरु कोइ वि सीसु णवि सव्वइं कम्मविसेसु ॥28॥
णवि तुहुं कारणु कज्जु णवि णवि सामिउ णवि भिच्चु ।
सूरउ कायरु जीव णवि णवि उत्तमु णवि णिच्चु ॥29॥
पुण्णु वि पाउ वि कालु णहु धम्मु अहम्मु ण काउ ।
एक्कु वि जीव ण होहि तुहुं मेल्लिवि चेयणभाउ ॥30॥
णवि गोरउ णवि सामलउ णवि तुहुं एककु वि वण्णु ।
णवि तणु अंगउ थूलु णवि एहउ जाणि सवण्णु ॥31॥
हउं वरु बंभणु णवि वइसु णउ खत्तिउ णवि सेसु ।
पुरिसु णउंसउ इत्थि णवि एहउ जाणि विसेसु ॥32॥
तरुणउ बुड्ढ़उ बालु हउं सूरउ पंडित दिव्वु ।
खवणउ वंदउ सेवडउ एहउ चिंति म सव्वु ॥33॥

देहहो पिक्खिवि जरमरणु मा भउ जीव करेहि ।
जो अजरामरु बंभु परु सो अप्पाण मुणेहि ॥34॥
देहहं उन्भउ जरममरणु देहहं वण्ण विचित्त ।
देहहं रोया जाणि तूहुं देहहं लिंगइं मित्त ॥35॥
अत्थि ण उब्भउ जरमरणु रोय वि लिंगइं वण्ण ।
णिच्छड अप्पा जाणि तुहुं जीवहं णेक्क वि सण्ण ॥36॥

कम्महं केरउ भावडउ जइ अप्पणा भणेहि ।
तो वि ण पावहि परमपउ पुणु संसारु भमेहि ॥37॥

अप्पा मेल्लिवि णाणमउ अवरु परायउ भाउ ।
सो छंडेविणु जीव तुहुं झायहि सुद्धसहाउ ॥38॥

वण्णविहूणउ णाणमउ जो भावइ सब्भाउ ।
संतु णिरंजणु सो जि सिउ तहिं किज्जइ अणुराउ ॥39॥

तिहुवणि दीसइ देउ जिणु जिणवरु तिहुवणु एउ ।
जिणवरि दीसइ सयलु जगु को वि ण किज्जइ भेउ ॥40॥

बुज्झहु बुज्झहु जिणु भणइ को बुज्झउ हलि अण्णु ।
अप्या देहहं णाणमउ छुहु बुज्झियउ विभिण्णु ॥41॥

वंदहु वंदहु जिणु भणइ को वंदउ हलि इत्थु ।
णियदेहाहं वसंतयहं जइ जाणिउ परमत्थु ॥42॥

उपलाणहिं जोइय करहुलउ ।
दावणु छोडहि जिम चरइ ।
जसु अखइणि समइं गयउ मणु ।
सो किम बुहु जगि रइ करइ ॥43॥

ढिल्लउ होहि म इंदियहं पंचहं विण्णि णिवारि ।
एक्क णिवारहि जीहडिय अण्ण पराइय णारि ॥44॥

पंच बलद्द ण रक्खियईं ।
णंदणवणु ण गओ सि ।
अप्पु ण जाणिउ ण वि परु ।
वि एमइह पव्वइओ सि ॥45॥

पंचहिं बाहिरु णेहडउ हलि सहि लग्गु पियस्स ।
तासु ण दीसइ आगमणु जो खलु मिलिउ परस्स ॥46॥

मणु जाणइ उवएसडउ जहिं सोवेइ अचिंतु ।
अचित्तहो चित्तु जो मेलवइ सो पुणु होइ णिचिंतु ॥47॥

वठ्टडिया अणुलग्गयहं अग्गउ जोयंताहं ।
कंटउ भग्गइ पाउ जइ भज्जउ दोसु ण ताहं ॥48॥

मणु मिलियउ परमेसरहो परमेसरु जि मणस्स ।
बिण्णि वि समरसि हुइ रहिय पुज्ज चडावउं कस्स ॥49॥

सकलं विकलं चरणं, तत्सकलं सर्वसङ्गविरतानाम्
अनगाराणां विकलं, सागाराणां ससङ्गानाम् ॥50॥

अम्मिए जो परु सो जि परु परु अप्पाण ण होइ ।
हउं डज्झउ सो उव्वरइ वलिवि ण जोवइ तो इ ॥51॥

मूढा सरलु वि कारिमउ णिक्कारिमउ ण कोइ ।
जीवहु जंत ण कुडि गइय इउ पडिछंदा जोइ ॥52॥

देहादेवलि जो वसइ सत्तिहिं सहियउ देउ ।
को तहिं जोइय सत्तिसिउ सिगधु गवेसहि भेउ ॥53॥

जरइ ण मरइ ण संभवई जो परि को वि अणंतु ।
तिहुवणसामिउ णाणमउ सो सिवदेउ णिभंतु ॥54॥

सिव विणु सत्ति ण वावरइ सिउ पुणु सत्तिविहीणु ।
दोहिं मि जाणहिं सयलु जगु बुज्झइ मोहविलीणु ॥55॥

अण्णु तुहारउ णाणमउ लक्खिउ जाम ण भाउ ।
संकप्पवियप्पिउ णाणमउ दुड्ढउ चित्तु वराउ ॥56॥

णिच्च णिरामउ णाणमउ परमाणंदसहाउ ।
अप्पा बुज्झिउ जेण परु तासु ण अण्णु हि भाउ ॥57॥

अम्हहिं जाणिउ एकु जिणु जाणिउ देउ अणंतु ।
णचरिसु मोहें मोहियउ अच्छइ दूरि भमंतु ॥58॥

अप्पा केवलणाणमउ हियडइ णिवसइ जासु ।
तिहुयणि अच्छइ मोक्कलउ पाउ ण लग्गइ तासु ॥59॥

चिंतइ जंपइ कुणइ ण वि जो मुणि बंधणहेउ ।
केवलणाणफुरंततणु सो परमप्पउ देउ ॥60॥

अब्भिंतरचित्त वि मइलियइं बाहिरि काइं तवेण ।
चित्ति णिरंजणु को वि धरि मुच्चहि जेम मलेण ॥61॥

जेण णिरंजणि मणु धरिउ विसयकसायहिं जंतु ।
मोक्खह कारणु एतडउ अवरइं तंतु ण मंतु ॥62॥

खंतु पियंतु वि जीव जइ पावहि सासयमोक्खु ।
रिसहु भडारउ किं चवइ सयलु वि इंदियसोक्खु ॥63॥

देहमहेली एह वढ तउ सत्तावइ ताम ।
वित्तु णिरंजणु परिण सिहुं समरति होइ ण जाम ॥64॥

जसु मणि णाणु ण विप्फुरइ सव्व वियप्प हणंतु ।
सो किम पावइ णिच्चसुहु सयलइं धम्म कहंतु ॥65॥

जसु मणि णिवसइ परमपउ सयलइं चित चवेवि ।
सो पर पावइ परमगइ अठ्ठइं कम्म हणेवि ॥66॥

अप्पा मिल्लिवि गुणणिलउ अण्णु जि झायहि झाणु ।
वढ अण्णाणविमीसियहं कहं॑ तहं केवलणाणु ॥67॥

अप्पा दंसणु केवलु वि अण्णु सयलु ववहारु ।
एक सु जोइय झाइयइ जो तइलोयहं सारु ॥68॥

अप्पा दंसणणाणमउ सयलु वि अण्णु पयालु ।
इय जाणेविणु जोइयहु छंडहु मायाजालु ॥69॥

अप्पा मिल्लिवि जगतिलउ जो परदव्वि रमंति ।
अण्णु कि मिच्छादिट्ठियहं मत्थइं सिंगइं होंति ॥70॥

अप्पा मिल्लिवि जगतिलउ मूढ म झायहि अण्णु ।
जि मरगउ परियाणियउ तहु किं कच्चहु गण्णु ॥71॥

सुहपरिणामहिं धम्मु वढ असुहइं होइ अहम्मु ।
दोहिं मि एहिं विवज्जियउ पावइ जीउ ण जम्मु ॥72॥

सइं मिलिया सइं विहडिया जोइय कम्म णिभंति ।
तरलसहावहिं पंथियहिं अण्णु कि गाम वसंति ॥73॥

अण्णु जि जीउ म चिन्ति तुहं जइ वीहउ दुक्खस्स ।
तिलतुसमित्तु वि सल्‍लडा वेयण करइ अवस्स ॥74॥

अप्पाए वि विभावियइं णासइ पाउ खणेण ।
सुरु विणासइ तिमिरहरु एक्कल्लउ णिमिसेण ॥75॥

जोइय हियडइ जासु पर एकु जि णिवसइ देउ ।
जम्मणमरणविवज्जियउ तो पावद परलोउ ॥76॥

कम्मु पुशइउ जो खवइ अहिणव पेसु ण देइ ।
परमणिरंजणु जो णवइ सो परमप्पउ होइ ॥77॥

पाउ वि अप्पहिं परिणवइ कम्मइं ताम करेइ ।
परमणिरंजणु जाम ण वि णिम्मलु होइ मणेइ ॥78॥

अण्णु णिरंजणु देउ पर अप्पा दंसणणाणु ।
अप्पा सच्चउ मोक्‍खपहु एहउ मूढ वियाणु ॥79॥

ताम कुतित्थइं परिभमइं धुत्तिम ताम करंति ।
गुरुहुं पसाएं जाम ण वि देहहं देउ मु्णंति ॥80॥

लोहिं मोहिउ ताम तुहं विसयहं सुक्ख मुणेहि ।
गुरुहं पसाएं जाम ण वि अविचल बोहि लहेहि ॥81॥

उप्पज्जइ जेण विबोहु ण वि बहिरण्णउ तेण णाणेण ।
तइलोयपायडेण वि असुंदरो जत्थ परिणामो ॥82॥

तासु लीह दिढ दिज्जइ जिम पढ़ियइ तिम किज्जइ ।
अह व ण गम्मागम्मइ तासु भजेसहिं अप्पुणु कम्मइं ॥83॥

वक्‍खाणडा करंतु बुहु अप्पि ण दिण्णु णु चित्तु ।
कणहिं जि रहिउ पयालु जिम पर संगहिउ बहुत्तु ॥84॥

पंडिय पंडिय पंडिया कण छंडिवि तुस कंडिया ।
अत्थे गंथे तुठ्ठो सि परमत्थु ण जाणहि मूढो सि ॥85॥

अक्खरडेहिं जि गव्विया कारणु ते ण मुणंति ।
वंसविहत्था डोम जिम परहत्थडा धुणंति ॥86॥

णाणतिडिक्की सिक्खि वढ किं पढियइं बहुएण ।
जा सुंधुक्की णिड्डहइ पुण्णु वि पाउ खणेण ॥87॥

सयलु वि को वि तडप्फडइ सिद्धत्तणहु तणेण ।
सिद्धत्तणु परि पावियइ चित्तह॑ णिम्मलएण ॥88॥

केवलु मलपरिवज्जियउ जहिं सो ठाइ अणाइ ।
तस उरि सतु जगु संचरह परइ ण कोइ वि जाइ ॥89॥

अप्पा अप्पि परिट्ठियएउ कहिं मि ण लग्गइ लेउ ।
सव्वु जि दोसु महंतु तसु जं पुणु होइ अछेउ ॥90॥

जोइय जोएं लइयइण जइ धंधइ ण पडिसि ।
देहकुडिल्ली परिखिवइ तुहुं तेमइ अच्छेसि ॥91॥

अरि मणकरह म रइ करहि इंदियविसयसुहेण ।
सुक्खु णिरंतरु जेहिं ण वि मुच्चहि ते वि खणेण ॥92॥

तूसि म रूसि म कोहु करि कोहें णासइ धम्मु ।
धम्मिं णठ्ठिं णरयगइ अह गउ माणुसजम्मु ॥93॥

हत्थ अहुठ्ठह॑ देवली वालहं णा हि पवेसु ।
संतु णिरंजणु तहिं वसइ णिम्मलु होइ गवेसु ॥94॥

अप्पापरहं ण मेलयउ मणु मोडिवि सहस त्ति ।
सो वढ जोइय किं करइ जासु ण एही सत्ति ॥95॥

सो जोयउ जो जोगवइ णिम्मलि जोइय जोइ ।
जो पुणु इंदियवसि गयउ सो इह सावयलोइ ॥96॥

बहुयइं पढियइं मूढ पर तालू सुक्कई जेण ।
एक्कु जि अक्खरु तं पढहु सिवपुरि गम्मइ जेण ॥97॥

अन्तो णत्थि सुईणं कालो थोओ वयं च दुम्मेहा ।
ते णवर सक्खियव्वं जिं जरमरणक्खयं कुणहि ॥98॥

णिल्लक्खणु इत्थीबाहिरउ अकुलीणउ महु मणि ठियउ ।
तसु कारणि आणी माहू जेण गवंगउ संठियउ ॥99॥

हुई सगुणी पिउ णिग्गुणउ णिल्लक्खणु णीसंगु ।
एकहिं अंगि वसंतयहं मिलिउ ण अंगहिं अंगु ॥100॥

सव्वहिं रायहिं छहस्सहिं पंचहिं रूवहिं चित्तु ।
जासु ण रंजिउ भुवणयलि सो जोइय करि मित्तु ॥101॥

तव तणुअं मि सरीरयहं संगु करि ठ्ठिउ जाहं ।
ताहं वि मरणदवक्कडिय दुसहा होइ णराहं ॥102॥

देह मलंतहं सवु गवइ मइ सुइ धारण धेउ ।
तहिं तेहइं वढ अवसरहिं विरला सुमरहिं देउ ॥103॥

उम्मणि थक्का जासु मणु भग्गा भूवहिं चारू ।
जिम भावइ तिम संचरउ ण वि भउ ण वि संसारु ॥104॥

जीव वहंति णरयगइ अभयपदाणें सग्गु ।
वे पह जवला दरिसियइं जहिं भावइ तहिं लग्गु ॥105॥

सुक्खअडा दुइ् दिवहडइं पुणु दुक्‍खहं परिवाडि ।
हियडा हउं पइं सिक्खवमि चित्त करिज्जहि वाडि ॥106॥

मूढा देह म रज्जियइ देह ण अप्पा होइ ।
देहहं भिण्णु णाणमउ सो तुहुं अप्पा जोइ ॥107॥

जेहा पाणहं झुंपडा तेहा पुत्तिए काउ ।
तित्थु जि णिवसइ पाणिवइ तहिं करि जोइय भाउ ॥108॥

मूलु छंडि जो डाल चडि कहं तह जोयाभासि ।
चीरु ण वुणणहं जाइ वढ विणु उठ्ठियइं कपासि ॥109॥

सव्ववियप्पहं तुठ्टहं चेयणभावगयाहं ।
कीलइ अप्पु परेण सिहु णिम्मलझाणठियाहं ॥110॥

अज्जु जिणिज्जइ करहुलउ लइ पइं देविणु लक्खु ।
जित्थु चडेविणु परममुणि सव्व गयागय मोक्खु ॥111॥

करहा चरि जिणगुणथलिहिं तव विल्लडित पगाम ।
विसमी भवसंसारगई उल्लूरियहि ण जाम ॥112॥

तव दावणु वय भियमडा समदम कियउ पलाणु ।
संजमघरहं उमाहियउ गउ करहा णिव्वाणु ॥113॥

एक्क ण जाणहि वट्टडिय अवरु ण पुच्छहि कोइ ।
अहुवियद्दहं डुंगरहं णर भंजंता जोइ ॥114॥

वट्‌ट जु छोडिवि मउलियउ सो तरुवरू अक्यत्थु ।
रीणा पहिय ण वीसमिय फलहिं ण लायउ हत्थु ॥115॥

छहदंसणधंधइ पडिय मणहं ण फिट्टिय भंति ।
एक्क देउ छह भउ किउ तेण ण मोक्खहं जंति ॥116॥

अप्पा मल्लिवि एक्कु पर अण्णु वइरिउ कोइ ।
जेण विणिम्मिय कम्मडा जइ पर फेडइ सोइ ॥117॥

जइ वारउं तो तहिं जि पर अप्पहं मणु ण धरेइ ।
विसयहं कारणि जीवडउ णस्यहं दुक्‍ख सहेइ ॥118॥

जीव म जाणहि अप्पणा विसया होसहिं मज्झु ।
फल किं पाकहि जेम तिम दुक्ख करेसहिं तुज्झ ॥119॥

विसया सेवहि जीव तुहं दुक्‍खहं साहिक एण ।
तेण णिरारिउ पज्जलइ हुववहु जेम घिएण ॥120॥

असरीरहं संधाणु किउ सो धाणुक्कु णिरुत्तु ।
सिवतत्तिं जिं संधियउ सो अच्छइ णिच्चिन्तु ॥121॥

हलि सहि काइं करइ सो दवाणु, जहिं पडिबिंबु ण दिसइ अप्पणु ।
धंधवालु मो जगु पडिहासइ, धरि अच्छंतु ण घरवइ दीसइ ॥122॥

जसु जीवंतहं मणु मुवउ पंचेंदियहं समाणु ।
सो जाणिज्जइ मोक्कलउ लद्धउ पहु णिव्वाणु ॥123॥

किं किज्जइ बहु अक्खरहं जे कालिं खउ जंति ।
जेम अणक्खरु संतु मुणि तव वढ मोक्खु कहंति ॥124॥

छहदंसणगंथि बहुल अवरुप्परु गज्जंति ।
जं कारणु तं इक्कु पर विवरेरा जाणंति ॥125॥

सिद्धंतपुराणहिं वेय वढ बुज्झतहं णउ भंति ।
आणंदेण व जाम गउ ता वढ सिद्ध कहंति ॥126॥

सिवसत्तिहिं मेलावडा इहु पसुवाहमि होइ ।
भिण्णिय सत्ति सिवेण सिहु विरला बुज्जइ कोइ ॥127॥

भिण्णउ जेहिं ण जाणियउ णियदेहहं परमत्थु ।
सो अंधउ अवरहं अंधयहं किम दरिसावइ पंथु ॥128॥

जोइय भिण्णउ झाय तुहुं देहहं ते अप्पाणु ।
जइ देहु वि अप्पउ मुणहि ण वि पावहि णिव्वाणु ॥129॥

छत्तु वि पाइ सुगुरुवडा सयलकालसंतावि ।
णियदेहडइ वसंतयहं पाहण वाडि वहाइ ॥130॥

मा मुट्टा पसु गरुवडा सयल काल झंखाइ ।
णियदेहहं मि वसंतयहं सुण्णा मढ सेवाइ ॥131॥

सयवयल्लहिं छहरसहिं पंचहिं रुवहिं चित्तु ।
जासु ण रंजिउ भुवणयलि सो जोइय करि मित्तु ॥132॥

तोडिवि सयल वियप्पडा अप्पहं मणु वि धरेहि ।
सोक्खु णिरंतरु तहिं लहहि लहु संसारु तरेहि ॥133॥

अरि जिय जिणवरि मणु ठवहि विसयकसाय चएहि ।
सिद्धिमहापुरि पइसरहि दुक्‍खहं पाणिउ देहि ॥134॥

मुंडियमुंडिय मुंडिया सिरु मुंडिउ चित्तु ण मुंडिया ।
चित्तहं मुंडणु जि कियउ संसारहं खंडणु तिं कियउ ॥135॥

अप्पु करिज्जइ काइं तसु जो अच्छई सव्वंगओ संते ।
पुण्णविसज्जणु काइं तसु जो हलि इच्छइ परमत्थे ॥136॥

गमणागमणविवज्जियउ जो तइलोयपहाणु ।
गंगइ गरुवइ देउ किउ सो सण्णाणु अयाणु ॥137॥

पुण्णेण होइ विहओ विहवेण मओ मएण मइमोहो ।
मइमोहेण य णस्यं तं पुण्ण अम्ह मा होउ ॥138॥

कासु समाहि करउं को अंचउं ।
छोपु अछोपु भणिवि को वंचउं ॥
हल सहि कलह केण सम्माणउं ।
जहिं जहिं जोवउं तहिं अप्पणउ ॥139॥

जइ मणि कोहु करिवि कलहीजइ ।
तो अहिसेउ णिरंजणु कीजइ ॥
जहिं जहिं जोयउ तहिं णउ को वि उ ।
हउं ण वि कासु वि मज्झु वि को वि उ ॥140॥

णमिओ सि ताम जिणवर जाम ण मुणिओ सि देहमज्झम्मि ।
जइ मुणिउ देहमज्झाम्मि ता केण णवज्जए कस्स ॥141॥

ता संकप्पवियप्पा कम्मं अकुणंतु सुहासुहाजणयं ।
अप्पसरुवासिद्धी जाम ण हियए परिफुरइ ॥142॥

गहिलउ गहिलउ जणु भणइ गहिलउ मं करि खोहु ।
सिद्धिमहापुरि पइसरइ उप्पाडेविणु मोहु ॥143॥

अवधउ अक्खरु जं उप्पज्जइ।
अणु वि किं पि अण्णाउ ण किज्जइ॥
आयइं चित्तिं लिहि मणु धारिवि ।
सोउ णिचिंतउ पाय पसारिवि ॥144॥

कि बहुएं अडवड वडिण देह ण अप्पा होइ ।
देहहं भिण्णउ णाणमउ सो तुहुं अप्पा जोइ ॥145॥

पोत्था पढणिं मोक्खु कहं मणु वि असुद्धउ जासु ।
बहुयारउ लुब्दउ णवइ मूलट्टिउ हरिणासु ॥146॥

दयाविहीणउ धम्मडा णाणिय कह वि ण जोइ ।
बहुएं सलिलविरोलियइं करु चोप्पडा ण होइ ॥147॥

भल्लाण वि णासंति गुण जहिं सहु संगु खलेहिं ।
वइसाणरु लोहहं मिलिउ पिट्टिज्जइ सुघणेहिं ॥148॥

हुयवहि णाइ ण सक्कियउ धवलतणु संखस्स ।
फिट्टीसइ मा भंति करि छुडु मिलिया खयरस्स ॥149॥

संखसमुद्दहिं मुक्कियए एही होइ अवत्थ ।
जो दुव्वाहहं चुंबिया लाएविणु गलि हत्थ ॥150॥

छंडेविणु गुणरयणणिहि अग्घथडिहिं घिप्पन्ति ।
तहिं संखाहं विहाणु पर फुक्किज्जंति ण भंति ॥151॥

महुयर सुरतरुमंजरिंहिं परिमलु रसिवि हयास ।
हियडा फुट्टिवि कि ण मुयउ ढंढोलंतु पलास ॥152॥

मुंडु मुंडाइवि सिक्‍ख धरि धम्महं वद्धी आस ।
णवरि कुडुंबउ मेलियउ छुडु मिल्लिया परास ॥153॥
णग्गत्तणि जे गव्विया विग्गुत्ता ण गणंति ।
गंथहं बाहिरभिंतरिहिं एक इ ते ण मुयंति ॥154॥

अम्मिय इहु मणु हत्थिया विंझह जंतउ वारि ।
ते भंजेसइ सीलवणु पुणु पडिसइ संसारि ॥155॥

जे पढिया जे पंडिया जाहिं मि माणु मरट्टु ।
ते महिलाण हि पिडि पडिय भमियहं जेम घरट्टु ॥156॥

विद्धा वम्मा मुट्टिइण फसिवि लिहिहि तुहुं ताम ।
जह संखहं जीहालु सिवि सुड्डच्छलइ ण जाम ॥157॥

पत्तिय तोडहि तडतडह णाइं पइट्टा उट्टु ।
एव ण जाणहि मोहिया को तोडइ को तुट्टु ॥158॥

पत्तिय पाणिउ दब्भ तिल सव्वइं जाणि सवण्णु ।
जं पुणु मोक्‍खहं जाइवउ तं कारणु कु इ अण्णु ॥159॥

पत्तिय तोडि म जोइया फलहिं जि हत्थु म वहि ।
जसु कारणि तोडेहि तुहुं सो सिउ एत्थु चढाहि ॥160॥

देवलि पाहणु तित्थि जलु पुत्थइं सव्वइं कव्वु ।
वत्थु जु दीसइ कुसुमियउ इंधणु होसइ सव्वु ॥161॥

तित्थईं तित्थ भमंतयहं किण्णेहा फल हूव ।
बाहिरु सुद्धउ पाणियहं अब्भिंतरु किम हूव ॥162॥

तित्थइं तित्थ भमेहि वढ धोयउ चम्मु जलेण ।
एहु मणु किम धोएसि तुहुं मइलउ पावमलेण ॥163॥

जोइय हियडइ जासु ण वि इक्कु ण णिवसइ देउ ।
जम्मणमरणविवज्जियउ किम पावइ परलोउ ॥164॥

एक्कु सुवेयइ अण्णु ण वेयइ ।
तासु चरिउ णउ जाणहिं देव इ ॥
जो अणुहवइ सो जि परियाणइ ।
पुच्छंतहं समिति को आणइ ॥165॥

जं लिहिउ ण पुच्छिउ कह व जाइ ।
कहियउ कासु वि णउ चिति ठाइ ।
अह गुरुवएऐसें चिति ठाइ ।
तं तेम धरंतिहिं कहिं मि ठाइ ॥166॥

कड्ढइ सरिजलु जलहिविपिल्लिउ ।
जाणु पवाणु पवणपडिपिल्लिउ ॥
बोह विबोहु तेम संघट्टइ ।
अवर हि उत्तउ ता णु पयट्टइ ॥167॥

बरि विविहु सद्दु जो सुम्मइ ।
तहिं पइसरहुं ण वुच्चइ दुम्मइ ॥
मणु पंचहिं सिहु अत्थवण जाइ ।
मूढा परमतत्तु फुडु तहिं जि ठाइ ॥168॥

अखइ णिरामइ परमगइ अज्ज वि लउ ण लहंति ।
भग्गी मणहं ण भंतडी तिम दिवहडा गणंति ॥169॥

सहजअवत्थहिं करहुलउ जोइय जंतउ वारि ।
अखइ णिरामइ पेसियउ सइं होसइ संहारि ॥170॥

अखइ णिरामइ परमगइ मणु घल्लेप्पिणु मिल्लि ।
तुट्टेसइ मा भंति करि आवागमणहं वेल्लि ॥171॥

एमइ अप्पा झाइयइ अविचलु चित्तु धरेवि ।
सिद्धिमहापुरि जाइयइ अट्ट वि कम्म हणेवि ॥172॥

अक्खरचडिया मसिमिलिया पाढंता गय खीण ।
एक्क ण जाणी परम कला कहिं उग्गउ कहिं लीण ॥173॥

वे भंजेविणु एक्कु किउ मणहं ण चारिय विल्लि ।
तहि गुरुवहि हउं सिस्सिणी अण्णहि करमि ण लल्लि ॥174॥

अग्गइं पच्छइं दहदिहहिं जहिं जोवउं तहिं सोइ ।
ता महु फिट्टिय भंतडी अवसु ण पुच्छइ कोइ ॥175॥

जिम लोणु विलिज्जइ पाणियहं तिम जइ चित्तु विलिज्ज ।
समरसि हूवइ जीवडा काइं समाहि करिज्ज ॥176॥

जइ इक्क हि पावीसि पय अंकय कोडि करीसु ।
णं अंगुलि पय पयडणइं जिम सव्वंग य सीसु ॥177॥

तित्थइं तित्थ भमंतयहं संताविज्जइ देहु ।
अप्प अप्पा झाइयइं णिव्वाणं पउ देहु ॥178॥

जो पइं जोइउं जोइया तित्थइं तित्थ भमेइ ।
सिउ पइं सिहुं हंहिंडियउ लहिवि ण सक्किउ तोइ ॥179॥

मूढा जोवइ देवलइं लोयहिं जाइं कियाइं ।
देह ण पिच्छइ अप्पणिय जहिं सिउ संतु ठियाइं ॥180॥

वामिय किय अरू दाहिणिय मज्झइं वहइ णिराम ।
तहिं गामडा जु जोगवइ अवर वसावइ गाम ॥181॥

देव तुहारी चिंत महु मज्झणपसरवियालि ।
तुहं अच्छेसहि जाइ सुउ परइ णिरामइ पालि ॥182॥

तुट्टइ बुद्धि तडत्ति जहिं मणु अंरावणहं जाइ ।
सो सामिय उवएसु कहि अण्णहिं देवहिं काइं ॥183॥

सयलीकरणु ण जाणियउ पाणियपण्णहं भेउ ।
अप्पापरहु ण मेलयउ गंगडु पुज्जइ देउ ॥184॥

अप्पापरहं ण मेलयउ आवागमणु ण भग्गु ।
तुस कंडंतहं कालु गउ तंदुलु हत्थि ण लग्गु ॥185॥

देहादेवलि सिउ वसइ तुहुं देवलइं णिएहि ।
हासउ महु मणि अत्थि इहु सिद्धें भिक्‍ख भमेहि ॥186॥

वणि देवलि तित्थइं भमहि आयासो वि णियंतु ।
अम्मिय विहडिय भेडिया पसुलोगडा भमंतु ॥187॥

वे छंडेविणु पंथडा विच्चे जाइ अलक्खु ।
तहो फल वेयहो किं पि णउ जइ सो पावइ लक्खु ॥188॥

जोइय विसमी जोयगइ
मणु वारणहं ण जाइ ।
इंदियविसय जि सुक्खडा
तित्थइं वलि वलि जाइ ॥189॥

बादउ तिहुवणि परिभमइ मुक्कउ पउ वि ण देइ ।
दिक्‍खु ण जोइय करहुलउ विवरेरउ पउ देइ ॥190॥

संतु ण दीसइ ततु ण वि संसारेहिं भमंतु ।
खंधावारिउ जिउ भमइ अवराडइहिं रहंतु ॥191॥

उव्वस वसिया जो करइ वसिया करइ जु सुण्णु ।
वलि किज्जउ तसु जोइयहि जासु ण पाउ ण पुण्णु ॥192॥

कम्मु पुराइउ जो खवइ अहिणव पेसु ण देइ ।
अणुदिणु झायइ देउ जिणु सो परमप्पउ होइ ॥193॥
विसया सेवइ जो वि परु बहुला पाउ करेइ ।
गच्छइ णरयहं पाहुणउ कम्मु सहाउ लएइ ॥194॥

कुहिएण पूरिएण य छिद्देण य खारमुत्तगंधेण ।
संताविज्जइ लोओ जह सुणहो चम्मखंडेण ॥195॥

देखंताहं वि मूढ वढ रमियइं सुक्खु ण होइ ।
अम्मिए मुत्तहं छिहु लहु तो वि ण विणडइ कोइ ॥196॥

जिणवरु झायहि जीव तुहुं
विसयकसायहं खोइ ।
दुक्‍खु ण देक्खहि कहिं मि
वढ अजरामरू पउ होइ ॥197॥

विसयकसाय चएवि वढ अप्पहं मणु वि धरेहि ।
चूरिवि चउगइ णित्तुलउ परमप्पउ पावेहि ॥198॥

इंदियपसरु णिवारियइं मण जाणहि परमत्थु ।
अप्पा मल्लिवि णाणमउ अवरु विडाविड सत्थु ॥199॥

विसया चिंति म जीव तुहुं सिवय ण भल्ला होंति ।
सेवंताहं वि महुर वढ पच्छइं दुक्खइं दिंति ॥200॥

विसयकसायहं रंजियउ अप्पहिं चित्तु ण देइ ।
बंधिवि दुक्किययकम्मडा चिरु संसार भमेइ ॥201॥

इंदियविसय चएवि वढ करि मोहहं परिचाउ ।
अणुदिणु झावहि परमपउ तो एहउ ववसाउ ॥202॥

णिज्जियसासो णिप्फंदलोयणो मुक्कसयलवावारो ।
एयाइं अवत्थ गओ सो जोयउ णत्थि संदेहो ॥203॥

तुट्टे मणवावारे भग्गे तह रायरोससब्भावे ।
परमप्पयम्मि अप्पे परिट्टिए होइ णिव्वाणं ॥204॥

विसया सेवहि जीव तुहुं छंडिवि अप्पसहाउ ।
अण्णइ दुग्गइ जाइसिहि तं एहउ ववसाउ ॥205॥

मंतु ण तंतु ण धेउ ण धारणु ।
ण वि उच्छासह किज्जइ कारणु ॥
एमइ परमसुक्खु॒ मुणि सुव्वइ ।
एही गलगल कासु ण रुच्चइ ॥206॥

उववास विसेस करिवि बहु एहु वि संवरु होइ ।
पुच्छइ किं बहु वित्थरिण मा पुच्छिज्जइ कोइ ॥207॥

तउ करि दहविहु धम्मु करि जिणभासिउ सुपसिद्धु ।
कम्महं णिज्जइ एह जिय फुडु अक्खिउ मइं तुज्झु ॥208॥
दहविहु जिणवरभासियउ धम्मु अहिंसासारु ।
अहो जिय भावहि एक्कमणु जिम तोडहि संसारु ॥209॥

भवि भवि दंसणु मलरहिउ भवि भवि करउं समाहि ।
भवि भवि रिसि गुरु होइ महु णिहयमणुब्भववाहि ॥210॥

अणुपेहा बारह वि जिय भाविवि एक्कमणेण ।
रामसीहु मुणि इम भणइ सिवपुरि पाहवि जेण ॥211॥

सुण्णं ण होइ सुण्णं दीसइ सुण्णं च तिहुवणे सुण्णं ।
अवहरइ पावपुण्णं सुण्णसहावेण गओ अप्पा ॥212॥

वेपंथेहि ण गम्मइ वेमुहसूई ण सिज्जए कंथा ।
विण्णि ण हुंति अयाणा इंदियसोक्खं च मोक्खं च ॥213॥

उववासह होइ पलेवणा संताविज्जइ देहु ।
धरु डज्झइ इंदियतणउ मोक्खहं कारणु एहु ॥214॥

अच्छउ भोयणु ताहं धरि सिद्धु हरेप्पिणु जेत्थु ।
ताहं समउ जय कारियइं ता मेलियइ समत्तु ॥215॥

जइ लद्धउ माणिक्कडउ जोइय पुहवि भंमंत ।
बंधिज्जइ णियकप्पडइं जोइज्जइ एक्कंत ॥216॥

वादविवादा जे करहिं जाहिं ण फिट्टिय भंति ।
जे रत्ता गउपावियइं ते गुप्पंत भमंति ॥217॥

कायोऽस्तीत्यर्थमाहारः कायो ज्ञानं समीहते ।
ज्ञानं कर्मविनाशाय तन्नाशे परमं पदम्‌ ॥218॥

कालहिं पवणहिं रविससिहिं चहु एक्कठइं वासु ।
हउं तुहिं पुच्छउ जोइया पहिले कासु विणासु ॥219॥

ससि पोखइ रवि पज्जलइ पवणु हलोले लेइ ।
सत्त रज्जु तमु पिल्लि करि कम्महं कालु गिलेइ ॥220॥

मुखनासिकयोर्म्मध्ये प्राणान् संचतें सदा ।
आकाशे चरते नित्यं स जीवो तेन जीवति ॥221॥

आपदा मूर्च्छितो वारिचुलुकेनापि जीवति ।
अंभ:कुंभसहस्त्राणां गतजीव: करोति किम् ॥222॥