ननु का नो हानि: स्यादस्तु व्यतिरेक एव तद्वदपि ।
किन्त्वन्वयो यथाऽस्ति व्यतिरेकोप्यस्ति चिदचिदिव ॥293॥
यदि वा स्यान्मतं ते व्यतिरेके नान्वयः कदाप्यस्ति ।
न तथा पक्षच्युतिरिह व्यतिरेकोप्यन्वये यतो न स्यात्‌ ॥294॥
तस्मादिदमनवद्यं केवलमयमन्वयो यथास्ति तथा ।
व्यतिरेकोस्त्यविशेषादेकोक्त्या चैकश: समानतया ॥295॥
दृष्टांतोप्यस्ति घटो यथा तथा स्वस्वरूपतोस्ति पट: ।
न घट: पटेऽथ न पटो घटेपि भवतोऽथ घटपटाविह हि ॥296॥
न पटाभावो हि घटो न पटाभावे घटस्य निष्पत्ति: ।
न घटाभावो हि पट: पटसर्गो वा घटव्ययादिति चेत्‌ ॥297॥
तत्किं व्यतिरेकस्यभावेन विनाऽन्वयोपि नास्तीति ।
अस्त्यन्वयः स्वरूपादिति वक्तुं शक्यते यतस्त्विति चेत्‌ ॥298॥