आस्तां शेषार्थजिज्ञासोरज्ञानाद्‌ व्याकुलं मनः ।
उपयोगी सदर्थेषु ज्ञानं वाप्यसुखावहम्‌ ॥280॥
प्रमत्तं मोहयुक्तत्वान्निकृष्टं हेतुगौरवात्‌ ।
व्युच्छिन्नं क्रमवर्तित्वात्‌ कृच्छं चेहाद्युपक्रमात्‌ ॥281॥
परोक्ष तत्परायत्तादाक्ष्यमक्षसमुद्भवात्‌ ।
सदोषं संशयादीनां दोषाणां तत्र सम्भवात्‌ ॥282॥
विरुद्धं बन्धहेतुत्वाद्बन्धकार्याच्च कर्मजम्‌ ।
अश्रेयोऽनात्मधर्मत्वात्‌ कालुष्यादशुचि: स्वतः ॥283॥
मूर्छितं यदपस्मारवेगवद्वमानतः ।
क्षणं वा हीयमानत्वात्‌ क्षणं यावददर्शनात्‌ ॥284॥
अत्राणं प्रत्यनीकस्य क्षणं शान्तस्य कर्मणः ।
जीवदवस्थातोऽवश्यमेष्यतः स्वरसस्थितिम्‌ ॥285॥
दिङ्मात्रं षट्सु द्रव्येषु मूर्तस्यैवोपलम्भकात्‌ ।
तत्र सूक्ष्मेषु नैव स्यादस्ति स्थूलेषु केषुचित्‌ ॥286॥
सत्सु ग्राह्येषु तत्रापि नाग्राह्येषु कदाचन ।
तत्रापि विद्यमानेषु नातीतानागतेषु च ॥287॥